Главная » Бобруйская РО » Святочная сустрэча ў Глушанскім Доме культуры

Святочная сустрэча ў Глушанскім Доме культуры

Як заўжды цёплую сустрэчу нала­дзіла для сваіх членаў Бабруйская раённая арганізацыя грамадскага аб’яднання “Беларускае таварыства інвалідаў” з нагоды “мужчынскага” і “жаночага” святаў.

Мерапрыемства прайшло ў сельскім Доме культуры пас. Глуша. За кубкам гарбаты сабраліся члены Глушанскай, Брожскай, Бортнікаўскай пярвічных арганізацый, інваліды-гараджане і валанцёры “БелТІ”.

З прывітальным словам да землякоў і гасцей урачыстасці звярнулася выконваючы абавязкі старшыні Глушанскага сельсавета Таццяна Плоская. Цёплыя пажаданні людзям з абмежаванымі магчымасцямі выказала кіраўнік раённай арганізацыі “БелТІ” Любоў Шушлянікава. Мужчынам яна пажадала і надалей заставацца абаронцамі сваіх сем’яў. Жанчынам, колькі б год не было, — быць прыгожымі, сардэчнымі, шчодрымі. Усім разам — любіць і цаніць жыццё, якія б складанасці і перашкоды не сустракаліся на яго дарозе.

Яшчэ адной місіяй дня было віншаванне імяніннікаў і юбіляраў года. Сярод апошніх — Святлана Пятроўна Кагоцька з Глушы (55 год), Антон Якаўлевіч Ляснічы (75 год) і Марыя Аляксееўна Ёшчык з гэтага ж населенага пункта (85 год). Ім і ўсім, хто адзначыў дзень нараджэння, ад арганізацыі былі ўручаны прадуктовыя наборы, а госці мерапрыемства — члены арганізацыі ансамбль народнай песні “Вясёлка” Бортнікаўскага СДК, падаравалі цудоўныя лірычныя кампазіцыі. Станоўчых эмоцый набраліся прысутныя ад выступу артыстаў мясцовага Дома культуры, валанцёраў арганізацыі — тэатральнай студыі “SAN LE”, шчодрага на жартаўлівыя вершы і байкі Івана Котава з Вялікіх Бортнікаў.

— Гэта так добра — сабрацца ра­зам, пабыць сярод людзей, пагава­рыць, — заўважыў Антон Якаўлевіч Ляснічы. — І падарункі тут не галоўнае. Значэнне мае — адчуць увагу да сябе. За гэта ён падзякаваў дэпутату райсавета дэпутатаў Васілю Рыгоравічу Амялюсіку і ўсім прысутным артыстам.

Увагі і ў гэты дзень, і на працягу года членам арганізацыі ўдзяляецца нямала. Гэта не толькі святочныя мерапрыемствы, але і наведванне інвалідаў на даму, і дапамога сельгаспрадукцыяй, іншымі прадуктамі харчу, адзеннем, удзел у экскурсіях, паездках.

— Усё гэта дзякуючы ў тым ліку нашым спонсарам, — кажа Любоў Шушлянікава. — Вось і ў арганізацыі гэтага свята дапамогу аказалі кавярня-кандытарская “Любімае месца” (дырэктар Яўген Аляксандравіч Пухкала), кампанія “Bro bakery Крафтовая Выпечка”, а таксама індывідуальны прадпрымальнік Валерый Васільевіч Доннікаў. Вялікі ім усім дзякуй ад членаў нашай арганізацыі.

Алена КАРПЕНКА.

Фота аўтара.